TAPUNIA O LE FAAMANATUINA O LE 63 TAUSAGA O LE TUTOATASI O SAMOA [01 Iuni 2025]

SAMOA, June 2 - SAUNOAGA a le afioga Fiame Naomi Mata’afa

O lea ua su’i ula tau i le tini, ma ua fa’alepa foe a tautai, auā o lea ua o tatou taunuu mai i le faaiuga o le sauniga aloaia faalemalo, mo le sisiina a’e o le tagavai o le Malo Tutoatasi o Samoa i lenei taeao matagofie. Ua faafofoga le Atua i la tatou taulaga osi e ala i le sauniga lotu faafetai i le afiafi ananafi, e faapea foi i lenei taeao, auā ua tini le uto, ua tau le ‘ai, ua o tatou patipatia le faailogaina o le 63 tausaga o le Malo Tutoatasi o Samoa.

Ua taoto i matagofie le malelega a lana afioga i le Ao Mamalu o le Malo i le taeao ua mavae. Ua maea foi utu pūpūina fulu o le segaula auā paia sausau gatā o Samoa, mai ona tumutumu mauga, seia o’o atu i ona fatu tūloto i le malelega a le Ao Mamalu. Ona ou manatu lea, o le a le toe āfea i le tautalaga. O paia o Samoa, ua o se ta’otoga i’a sā.

A o le asō, e le mavae le agaga faafetai. Aua e ui i se naunau o le tatou Malo, ma se tapenaga a le Komiti o le Tutoatasi sa fuafua ma faatulaga, e lē taunuu pe ana leai le taitaiga mamana a lo tatou Matai Sili.

O la tatou faafetai i le Atua, ua o tatou maua le laolao lelei i lenei aso, e faataunuu ai le faamoemoe o si o tatou atunuu. O le ala lea, o so’o se faatasiga tele a le tatou Malo, tatou te muai tapā le Nofoalii o le alofa tunoa, e topule mai lona Agaga. E pei ona saunoa i ai le Taitai o le Sauniga i lenei taeao.

Ou te faafetai atu i lau afioga i le Ao Mamalu o le Malo mo lau malelega. O lenei sauniga faalemalo, e saga faamanatu mai ai pea i o tatou tupulaga, faapea tupulaga lalovaoa o si o tatou atunuu, lo tatou tofi o le Malo tutoatasi, na aumai e le Atua. Tatou te lalago faatasi e vanivani ma puipui, e sufi, e faasolo, ma tapui, Samoa nei galo.

E ui ina souā la tatou folauga i luitau o faigamalo temokarasi, ae lē aveesea le mau tauave mai o tatou tuaā, o Samoa o le aiga, o le atunuu filemu, e faavae i le Atua.

Ou te faafetai tele atu i le afifio mai o le paia o le atunuu, aemaise Aoga, Matagaluega ma Faalapotopotoga, o Nuu ma Afioaga, ma Komiti esese sa faatino la tatou solo faaaloalo i lenei taeao. Faafetai tele le faamaopopo, faamalo le taupati mai i lo tatou faamoemoe.

Ou te faafetai atu i lau afioga i le Kovana Sili o le Malo o Tutuila ma Manu’a – lau afioga Pulaalii Nikolao Pula ma lou Faletua i lo lua afifio mai, tatou te molimauina le faamoemoe o lenei itu o le tatou maota tele. E faapea foi i lau afioga i le Ulu o Toelau ma lou Faletua i le afifio mai. Ua maualuga lenei aso i lo outou tala aao mai.

Ia manuia lau afioga i le Ao Mamalu o le Malo ma le Masiofo. Ia soifua laulelei outou i Sui o le Fono a Sui Tofia, Le maualuga o le Tafatolu o le Malo Tutoatasi o Samoa. Sui o Malo ma Faalapotopotoga mai Fafo, Le paia o le aufaigaluega totofi a le Atua, ae a le paia o Samoa i ona tulaga faalupe. Ia manuia tele le faamanatuina o le 63 tausaga o lo tatou Malo Tutoatasi.

————————————————————————–

We have now come to the end of the celebration of 63 years of Samoa’s Independence.

We welcome every opportunity to fellowship and to share on the essence of sovereignty and the success of our democracy.

In this juncture;

• Let me acknowledge all those who took part in the march past this morning. Thank you for supporting our programme, and it was especially joyful to see all of you enjoying the occasion.

• To our Guests of Honour – the Honourable Governor of American Samoa and the Head of Tokelau, Can I thank you for accepting our invitation to join us in celebrating 63 years of Samoa’s Independence. Your presence has made this occasion more memorable. May He lead you safely back to your home.

• Let me also acknowledge the contribution of our development partners over these many years of our journey. Thank you Excellencies for the goodwill and support for Samoa.

God bless,

Soifua ma ia manuia.

Photo by the Government of Samoa [Peseta Tusiga Taofiga]

See insights and ads

Boost post

All reactions:

229229

June 11, 2025